ما جيتش للدّنيا هاذيّا باش ينظّروا عليّا على كذب الدّيمقراطيّة والشيوعيّة والامپرياليّة والرأسماليّة والوهابيّة والسّلفيّة . في بالي جيت باش نقرى على الحضارات، ندور بين المتاحف والحانات، باش نحلم ، باش نعنّق النّجوم ، باش نتفرّج في الرّسوم ، باش نعدّي أيّامات في وسط كثبان الصّحراء نسوق وليالي وانا نروق ، باش نتلاطخ مع موج البحر ، باش نصوّر فوق أوراق الشّجر ، باش نشطح فوق السّحاب ، باش نذوب في وسط الضّباب ، لا ما تحطّوليش لجام ، نحبّ نكسّر البلج، نخرج نصيح ونحتجّ ، ما تسرقوش من قلبي الحبّ ، ما نحبّش نقراه كان في الكتب…

يقولولي العالم هذا مزيان ، يكذبوا علينا ، العالم ما يشبّهليش ما عندوش بوسة الخالة اللّي في كفّ يديّا ، لا الورد اللّي على خديّا ، ماعندوش لمعة عينيّا ولا السرّ اللّي في رموش كلّ بنيّة . العالم هذا كذّاب ، ما تمشي فيه حتّى نصيحة ، كلّ يوم يعطيك طريحة وزيد يخزرلك بعين صحيحة ، يلعب بيك ، يبيعك ويضحك على شاريك …

نحبّ نغنّي ما تسرقوش صوتي منّي ، نحبّ نطير مع الأطيار ، نحبّ يهديولي نوّار ومالرّماد نشعّل النّار