عفت الأشغال المنزليّة ، ماعادش نحبّ نحدّد السّواري ، وماعادش عندي كيف باش نطيّب مدربل وطاجين البيّ ، نحبّ ناكل كسكروت وما نحدّد كان حوايجي ، ونعيش كان لروحي ومانعمل كان الحاجات اللّي نحبّهم ونحبّ نخرج نسهر ، ونلبس العريان ، وما نحبّ حدّ يعسّ عليّا ، وماعاد نحمل حتّى صوت يصيح عليّا ويسبّني ويعايرني.

نحبّ نرجع نشطح ونمشي للسّينما والمسرح وانا موش مفجوعة وموش خارجة بالسّرقة كينّي عاملة جريمة ، نحبّ كي نخرج نقضي نقعد قدّ ما نحبّ ونجرّب حمامر وماكياج وأنواع پارفان ونتعدّى نعمل قهوة ، نحبّ نعيش ونهزّ وننفض ونتمرّد وننفض ونرفض ونتمرّد ، نحبّ نعرف عبد يقلّي محلاك، مزينك، يبعثلي ميساج يقلّي توحّشتك ، أخلط عليّا للبلاصة الفلانيّة .

نحبّ نعيش العيشة اللّي نحسّها متاعي ، على خاطر هاذي موش حياتي . كلّ حاجة تربطني بيه نحبّ نقطّعها ، صوتي الدّخلاني ولّى يصيح بالقويّ لين وذنيّا تصدّعت .