الأرض شاحت ، الألوان بلاحت ، الصّغر وفى ، الوقت جرى ، وتنطّر الزّمبراك في الهواء
حيط يهزّ ، حيط يردّ وانا ضعت ونسيت النصّ
آاااااي عندي وجيعة
وجيعة تشوي ، تشوشط ، تقرص، تسطّر ، تدڤّ ، تحرق
قالولي حريّة ، قلتلهم ربطيّة وحبس بحكم مؤبّد
عالم مدردر ، مزفطر ، رهدان، سكبان ، واطي ، مخاوز
دوني …
عالم سيّب ضبوعتو، ليل هيّج ذيوبتو
مغاغر بحنوشاتهم، بحورات ببلاّعاتهم، صحاري بعواصفهم، قوايل بشواطنهم وانا نتفرّج ونبلع ونغصّ
نحبّ نحمّر ونحرقص وندبّغ
نحبّ نكحّل ونصبغ ونتصدّر
نحبّ نبكي ونصيح ونعيّط
نحبّ نفرح ونغنّي ونشطح
نحبّ نكسّر ! نحبّ ندڤدڤ واللي يجي قدّامي نمشّيه زيزي
يا دنيا وينك توحّشتو زينك !
جاوبني ، كلّمني ، عنّقني ، أمسحلي دمعتي ، طبطبلي على كتفي وقلّي علاش ؟ تي علاش يصير فيّا هذا الكلّ ؟