الحبّ الأوّل عندو طابع سحري ، ساعات حتّى ملحمي ، آما عمرو لا حدّ سإل على الحبّ الاخّر ، اللّي يجي بعد الخذلان ، تجارب تعّبتنا ، عزّة نفس ساعات خانتنا وطيحات بطينا باش قمنا منهم . يظهرلي الحبّ الاخّر أهمّ مالأوّل ، خاطرو يطير بيك ، يقوّيك ، يشجّعك ، يزيّنك ، يملاك، يلوّنلك الدّنيا ، يرجّعلك شعلة الحياة وجمال البدايات ويهديلك الصّغر مرّة أخرى .

الحبّ الاخّر يرمّم اللّي تكسّر ، يداوي اللّي ترضرض، يسرّح اللّي تخبّل ، هو حالة من التجلّي … كينّك تولدت للعبد هذاكا والاّ بالكشي هو تولد ليك والعالم سخّر كلّ شيّ باش يخلّيك تتلاقى بيه ، والاّ كينّهم القوانين الكونيّة تحطّوا باش تكونوا مع بعضكم، وعلى غير رادة تفرغ الدّنيا وتتعبّى كان بيه