الحبّ لازمو يحرّرك ، يزيّنك ، يضيفلك، يداويك، ينحّيلك العقد ، يبرّيك ، يضوّي ثنيّتك ، يخلّيك ترقد فرحانة وتقوم فرحانة . هو اليدّ اللّي تطلّعك الفوق وتحطّك في مقام يليق بيك وتدزّك القدّام باش تخرّج منّك أحلى ما فيك ، هو القلب اللّي يتحلّ باش يسكّنك ويحتويك وخاصّة هو العينين اللّي تخزرلك وتقلّك إنت أهمّ حاجة بالنسبة ليّا .

الحبّ يشبّه للمغارب في الرّبيع ، يشبه لبابا وأمّي يرحمها كي يبداوا قاعدين في التّيراس اللّي بجنب الكوجينة ، هو يتكيّف في پيپّا وهي سيڤاروها في مبسم ولابسة روبة خفيفة ويسمعوا في غناية إنت الحبّ متاع أمّ كلثوم، وكي يجي المقطع اللّي تقول فيه  » واحشني وانت قصاد عيني وشاغلني وانت بعيد عنّي  » تطلع معاها ممّا وتبدى تتزعبن على عمّك مصطفى وهو يفتل في شلاغمو، وانا نلعب في الجنينة ونشمّ في ريحة الفراز بالزّهر اللّي خارجة مالصّحفة اللّي قدّامها تحضّر فيها للدّيسار وعلى هذاكا كنت نحسّ في روحي في علاقة غالطة مع قيصر خاطر كي كنت معاه ما كنتش نشمّ ريحة الفراز بالزّهر